2014-5-20 9:00:00
【文：阿悅媽】
又到臨近考試季節，作為阿媽嘅我，都要準備一下幫阿女温書，以望能順利升級。準備温習嘅材料唔難揾，因為坊間的補充練習多的是，網上資料更完備到令自己以為是小學教師預備教材。最難拿捏的，反而是如何做到適可而止？
適可而止，為何重要？除了考試範圍，作為家長，可能又想為細路預備定艱深少少的練習以防萬一，即是一個考試範圍有加冇減機制！時間得咁多，為咗考試，家長可以去得好盡！但係，你個細路係咪都可以去到咁盡呢？所以，適可而止，係作為父母，要提醒和要做得到嘅很重要一點！
我也在學習如何適可而止，初步實踐，是提醒自己在日常生活中，也要將心比己（將自己當細路！哈哈）。
作為一個在職家長，因為細路返學嘅時間，基本上同我地返工工時差不多，所以，較容易做到將心比己。
將心比己事例一，我地嘅細路，一放學已經可能要去上興趣班，補習班。如果自己每日放工，趕住上進修課程，開心啲上個興趣班，但係當你一星期五日，每日都要上，俾你上多幾個月，你都想抖吓，走吓堂去個 happy hour 或者去 shopping 吓，輕鬆吓！但係，喺家長嘅嚴密監控下，細路就算病咗冇上堂，都只有補堂，冇得走堂。更可况話想 happy hour 玩吓玩具，睇吓卡通？
將心比己事例二，如果你老公／老婆，叫你上興趣班時（例如學陶瓷，學攝影），要你半年來要交出幾多件作品或者要報比賽以示你有學習成績……咁樣，你仲會有興趣學這個興趣班嗎？但係，細路嘅興趣班，唔知點解，點都會有個比賽，冇比賽都實會有個評核……咁樣，明明有興趣，都變得冇趣啦！我唔反對細路上興趣班，俾佢地試吓，學吓唔同範疇嘅嘢，發掘自己嘅喜好，係好事，不過，點解一定要拿出點成績來？點解一定會有個目標要達到？我哋去進修，去上興趣班，起碼知道自己要上幾耐，自己有得計劃睇到幾時完；但係班細路根本只睇到無窮無盡的補習班，興趣班。興趣，係一件令自己放鬆，享受，投入嘅事，唔一定要有特定目標的。點解大人可以享受興趣，但係細路就要被評核興趣？ 攞興趣嚟比賽？諗起都沮喪！
將心比己事例三，星期六，日，我地自己都會諗吓，返咗成個星期工，點都要俾自己抖吓，放鬆吓。但係星期六日，又係細路學習班，興趣班嘅高峰日子……家長可以話，已經揀啲俾佢地當玩咁學啦！咁我同你講，我限住你星期六日放假要跟著我安排咁玩，個個星期一樣……你又會點？玩得兩個月都悶啦！如果咁好可以留喺屋企，班細路一係睇電視又話嘥時間，上網又話會近視，玩玩具又話不如做練習，温書……咁，其實，當家長們可以煲劇，上網打機，去做 facial ，去 shopping 時，細路又可唔可以自己揀吓玩咩？就算個細路揀坐喺度發呆，起碼，都叫有得揀！
作為家長我都明白，總覺得時間太少，細路要做要學要跟進的事情太多……不過，重點係，適可而止！我地只要間中想像一下，由我地去行細路嘅時間表，我哋會點？你就會原諒，點解有時班細路會喺補習班瞓著覺，發呆，點解細路會唔肯去興趣班……因為，大人細路，都會有攰嘅時候，都會有想俾自己放空一下的時候！
所以，在準備幫阿女温習考試範圍時，不斷提醒自己，貼緊範圍就夠了，學海無涯，適可而止呀！當 我督促佢温習到我都攰嘅時候，諗下，細路可能仲攰呀！大家都要抖一抖！
當我能做到將心比己，自然會學懂適可而止。此乃我升阿媽小學二年級的大課題，共勉之！
留言
張貼留言